လူဆိုးတစ်ယောက်ရဲ့နောင်တများ...

                                                           
ခုံပေါ်ထိုင်ချင်တဲ့သူဟာ

ခုံကိုနိုင်ဖို့လည်းလိုမယ်

တစ်ခါတစ်လေတော့လည်း 

လက်ထဲကငွေကြေး သိပ်လေးတယ်လို့ ခံစားမိတယ် 
ကျွန်တော်..ဘယ်လောက်သယ်နိုင်ပြီး

ဘယ်လောက်ချထားခဲ့နိုင်မလဲ

အမေက မီးဖိုချောင်ထဲက ဆန်အိုး

မိုးပြီးကြည့်နေချိန်မှာ

ကျွန်တော်က လက်ဖက်ရည်ဖိုးအတွက် ကြိုးစားနေမိတယ်..

ကျွန်တော်ကလူဆိုးပါ..အမေ

အိမ်ပြန်ရောက်မှ အမေ့ကိုမေးရမယ်

“လမ်းမှတောင်းတဲ့လူလည်းရှိတယ်၊ ပေးတဲ့လူလည်းရှိတယ်

သားဘာကိုရွေးရမလဲ” လို့

ပေလိုလူနဲ့ တူလိုလူကြား

မီးဖုတ်ထားတဲ့ ဓါးတစ်ချောင်းလည်း ဖြစ်ဖူးတယ်...။

လေထုဖိအားနဲ့ ကမ္ဘာ့ဆွဲအားကြားက ကျွန်တော်တို့အတွက်

ဘေးကြပ်နံကြပ်ဆိုတာ 

မတ်မတ်ရပ်နိုင်ဖို့ဖြစ်တယ်

သေမယ့်အတူတူတော့ 

ငတေတစ်ကောင်လောက်မာခွင့်ရမယ်ဆိုလည်း

ကျွန်တော်ကျေနပ်ပါတယ်

(ဖြေသိမ့်မိတယ်)

ကိုယ့်သမိုင်းကိုယ်ရေးတာမှန်ပေမယ့် 

နောက်လူတွေ ဘယ်လိုများခိုင်းနှိုင်းကြမှာပါလိမ့်...

တွေးမိပါသေးတယ်..

တကယ်တော့ ငါက

လ,တစ်ခြမ်းပဲမြင်တဲ့သူ...

ဟိုဘက်ကမ်းကမီးမထိန်ဘူးကွယ်....